భక్తులతో నిండిపోయిన వైకుంఠం క్యూ కాంప్లెక్స్‌

నవదిశ, అమరావతి:

• తిరుమలలో భారీగా పెరుగుతున్న భక్తుల రద్దీ:
• సర్వదర్శనానికి 18 గంటల సమయం!
• శిలాతోరణం వరకు క్యూలైన్లు
• ⁠భక్తులకు ఇబ్బందులు కలుగకుండా చూస్తున్న అధికారులు
• క్యూలైన్లలోనే పాలు, తాగునీరు, అన్నప్రసాదాలు⁠

కలియుగ వైకుంఠమైన తిరుమల క్షేత్రంలో భక్తుల రద్దీ విపరీతంగా పెరిగింది. వీకెండ్ (వారాంతం) కావడంతో దేశం నలుమూలల నుండి స్వామివారి దర్శనార్థం భక్తులు పెద్ద ఎత్తున తిరుమలకు పోటెత్తారు.

శిలాతోరణం వరకు క్యూలైన్లు: తిరుమలలోని వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు భక్తులతో పూర్తిగా నిండిపోయాయి. కంపార్ట్‌మెంట్లు దాటి వెలుపల ఉన్న క్యూలైన్లు సుదూరంగా సాగుతూ చారిత్రక శిలాతోరణం వరకు చేరుకున్నాయి. టోకెన్లు లేని భక్తులకు శ్రీవారి సర్వదర్శనం (ఉచిత దర్శనం) లభించడానికి దాదాపు 15 నుండి 18 గంటల సమయం పడుతోంది. భక్తులకు ఎలాంటి ఇబ్బందులు కలగకుండా తిరుమల తిరుపతి దేవస్థానం అధికారులు నిరంతరం పర్యవేక్షిస్తూ, క్యూలైన్లలోనే పాలు, తాగునీరు, అన్నప్రసాదాలను అందిస్తున్నారు.

శనివారం నాటి భక్తుల రద్దీ, హుండీ ఆదాయం వివరాలు: శ్రీవారి ఆలయంలో భక్తుల సందడి ఏ స్థాయిలో ఉందో నిన్నటి (శనివారం) గణాంకాలే స్పష్టం చేస్తున్నాయి. శ్రీవారి దర్శనం: నిన్న ఒక్కరోజే మొత్తం 93,303 మంది భక్తులు స్వామివారిని దర్శించుకున్నారు. దర్శనానికి వచ్చిన భక్తులు ఒక ఎత్తైతే మొక్కలు తీర్చుకోవడానికి వచ్చే భక్తులు లెక్కలు ఇలా ఉన్నాయి. తలనీలాలు: మొక్కులు చెల్లించుకునేందుకు గాను 41,688 మంది భక్తులు స్వామివారికి తలనీలాలు సమర్పించారు. శ్రీ వారికి కానుకలు ఆదాయం: భక్తులు కానుకల రూపంలో సమర్పించిన శ్రీవారి హుండీ ఆదాయం నిన్న ఒక్కరోజే రూ. 4.49 కోట్లు దాటినట్లు ఆలయ అధికారులు వెల్లడించారు. రానున్న రెండు రోజులు కూడా ఇదే స్థాయిలో రద్దీ కొనసాగే అవకాశం ఉన్నందున, తిరుమలకు వచ్చే భక్తులు వేచి ఉండే సమయాన్ని దృష్టిలో ఉంచుకుని తగిన జాగ్రత్తలతో రావాలని అధికారులు సూచిస్తున్నారు.